De Jong sfidon Bayernin: Nuk më intereson kush është favorit, duam fitoren!

Frenkie de Jong është i bindur se Barcelona do të bëjë mirë edhe ndaj Bayernit për të siguruar një vend në gjysmëfinale. Në prag të super ndeshjes ndaj skuadrës gjermane, mesfushori holandez është shfaqur shumë optimistë.

“Nuk më intereson kush është favoritja. Bayern është një ekip i shkëlqyer, por ne do të shohim se çfarë ndodh dhe kush do të jetë më i mirë. Jemi ndër favorite sepse Barcelona është gjithmonë. Por ka disa ekipe që mund të fitojnë Ligën e Kampionëve.

Ekipi arriti në Lisbonë me shumë besim, jemi një nga skuadrat më të mira në botë, me lojtarë të shkëlqyeshëm. Me Napoli ishte një ndeshje e mirë, fituam kundër një kundërshtari të vështirë. Luajtëm një pjesë të parë super dhe kjo na bëri të ndjehemi më të qetë në të dytën.

Afrimi i Pjanic? Ai është një lojtar i jashtëzakonshëm, vendos cilësinë kur e ka topin në këmbët e tij. Kam luajtur kundër tij sezonin e kaluar në Ligën e Kampionëve. Jam i sigurt që do ta fuqizojë edhe më shumë Barcelonën”, deklaroi De Jong.