Debutim me ankth për Alen Sherrin, portieri dëmtohet rëndë në sfidën ndaj Monzës

Debutimi zyrtar i Alen Sherrit me Frosinonen në Kupën e Italisë u shoqërua me momente frike. Portieri i Kombëtares shqiptare u detyrua të linte fushën 10 minuta para përfundimit të takimit ndaj Monzës, pas një përplasjeje të fortë.

Në përpjekje për të larguar topin pranë vijës fatale, Sherri u godit pa dashje në fytyrë nga një prej shokëve të skuadrës. Menjëherë pas incidentit ndërhyri stafi mjekësor, por 26-vjeçari nuk ishte në gjendje të vazhdonte lojën dhe trajneri u detyrua ta zëvendësonte.

Ky ishte debutimi i tij në një ndeshje zyrtare me Frosinonen, pas paraqitjes së parë në miqësoren ndaj Carasano disa javë më parë. Sherri u bashkua këtë verë me klubin nga Serie B në formë huazimi nga Cagliari, me opsion blerjeje në fund të sezonit.