Dinamo dhe Elbasani ndajnë pikët në “Air Albania”

Dinamo dhe Elbasani u ndalën në një barazim 1-1 në ndeshjen kryesore të javës së 12-të në Superiore, duel i zhvilluar mbrëmjen e sotme në “Air Albania”.

Sfida nisi me ritëm, ndërsa verdheblutë gjetën golin e avantazhit në minutën e 34-të me Tsague, i cili shfrytëzoi në maksimum një aksion të shpejtë në zonë. Dinamo reagoi shpejt dhe barazoi shifrat pak para pushimit, kur Dejvi Bregu u tregua i saktë nga pika e bardhë në minutën e 43-të.

Pjesa e dytë nuk ofroi të njëjtin intensitet, me të dy skuadrat që u treguan të kujdesshme dhe prodhuan pak raste të rrezikshme për shënim. Në minutat e mbetura rezultati nuk ndryshoi, duke bërë që të dy ekipet të marrin nga një pikë.

Elbasani ngjitet përkohësisht në krye të renditjes me 24 pikë, teksa pret rezultatin e ndeshjes mes Vllaznisë dhe Partizanit. Ndërkohë, Dinamo mban vendin e katërt me 19 pikë, duke mbetur në garë për zonën europiane.