Douglas Luiz nuk paraqitet në grumbullim, Juventus bën gati ndëshkimin për të

Douglas Luiz ka krijuar rastin e parë problematik te Juventus në ditën e parë të grumbullimit nën drejtimin e Igor Tudor. Sipas asaj që raporton TMË, mesfushori brazilian nuk është paraqitur në stërvitje këtë mëngjes dhe nuk ka dhënë asnjë arsye për mungesën e tij.

Klubi bardhezi është në pritje të sqarimeve dhe, në ndërkohë, ka nisur procedurat për një masë disiplinore ndaj lojtarit, i cili rrezikon një ndëshkim të brendshëm për sjelljen e tij.

Pas një sezoni të parë jo bindës, me më shumë hije se dritë, Douglas Luiz dëshiron të rikthehet në Premier League. Megjithatë, veprime të tilla nuk priten t’i lehtësojnë largimin. Mungesa në stërvitje, pa lajmërim apo arsye zyrtare, mund ta vështirësojë situatën për të dhe për raportin me klubin.

Ndryshe nga Luiz, dy lojtarë kishin leje zyrtare për të munguar në ditën e parë të grumbullimit: Jonathan David, i cili do t’i bashkohet skuadrës ditën e nesërme, dhe Francisco Conceição, i sapoafruar nga Porto.

Në këtë mënyrë, starti i përgatitjeve verore për Juventusin nis me një rast të pazakontë, që mund të ketë pasoja për të ardhmen e Douglas Luiz në klubin bardhezi.