E BUJSHME/ Uzuni arrin akordin me skuadrën e La Ligas

Myrto Uzuni i befason të gjithë në ditët e fundit të merkatos. Sulmuesi i Kombëtares Shqiptare në limitet e merkatos së janarit i bashkohet Granadas në LaLiga.

Gjithçka konfirmohet nga mediet hungareze, të cilat raportojnë se 26-vjeçari do të ndryshojë kampionat, duke u bërë pjesë e një prej ligave më të forta në Europë.

Uzuni nuk është grumbulluar për ndeshjen e kësaj të diele të Ferencvarosit kundër Ujpestit. Mësohet se marrëveshja mes dy klubeve është totale dhe pritet thjesht zyrtarizimi i sulmuesit kuqezi në klubin spanjoll. Mediet hungareze shkruajnë se do të jetë një nga transferimet më të shtrenjta nga Liga e Parë e Hungarisë.

Ferencvarosi mendohet se do të përfitojë 3.5 milionë euro, ndërsa futbollisti shqiptar do të nënshkruajë kontratë 4-vjeçare. Për një sezon e gjysmë në radhët e Ferencvarosit, Uzuni është aktivizuar në total në kampionat në 35 ndeshje dhe ka shënuar 19 gola.