E KRYER/ Kolo Muani rikthehet te Juventusi, ja formula e transferimit

Gjithçka është gati për rikthimin e Kolo Muani te Juventusi. Bardhezinjtë kanë arritur marrëveshjen me PSG-në për sulmuesin francez, i cili pritet të mbërrijë në Torino në ditët e ardhshme dhe të jetë i gatshëm për ndeshjen e parë të kampionatit, të dielën më 24 gusht kundër Parmës në orën 20:45.

Marrëveshja parashikon një huazim me pagesë prej 10 milionë eurosh, me detyrim blerjeje prej 45 milionë eurosh në fund të sezonit të ardhshëm. Bisedimet, që zgjatën prej disa javësh, përfunduan me sukses, duke kënaqur lojtarin që gjithmonë kishte shprehur dëshirën për t’u rikthyer te Juventusi.

Operacioni është i pavarur nga çështja Vlahovic, e cila mbetet e hapur, por pa ndikim në marrëveshjen për Kolo Muanin. Juventusi dhe PSG-ja arritën kompromis, pasi francezët fillimisht kërkonin rreth 65 milionë euro. Drejtori Comolli arriti të ulë koston, duke vendosur formulën “10 milionë tani + 45 milionë në fund të sezonit”.

Kolo Muani kishte luajtur me Juventusin në janar si huazim me pagesë, duke shënuar 8 gola në 16 paraqitje në kampionat, performancë që e bindi trajnerin Tudor të kërkonte rikthimin e tij. Tani, “Zonja e Vjetër” do të përqendrohet te largimet: përveç Vlahovic, në listën e mundshme të largimeve janë Nico Gonzalez (drejt Atletico Madrid) dhe Douglas Luiz (drejt Nottingham Forest).