Egbo: Pres një Bylis agresiv, ja çfarë u thashë lojtarëve në pushimin me Skënderbeun

Tirana është pranë titullit kampion këtë sezon, por trajneri Emanuel Egbo duket se nuk mjaftohet vetëm me këtë trofe në 100-vjetorin klubit. Përpara ndeshjes me Bylisin për gjysmëfinalen e Kupës, ai ka karikuar skaudrën e tij për të marrë një rezultat pozitiv.

“Normalisht është një ndeshje e vështirë. Edhe ne, edhe ata e dëshirojmë këtë finale. E kemi vlerësuar maksimalisht këtë takim. Bylisi është skuadër që u ka hapur probleme shumë skuadrave në kampionat. Kanë kontingjent që japin maksimumin në fushë.

Është ndeshje kupe. Në kampionat është ndryshe. Ndeshja e parë Kupës luhet në shtëpinë e tyre, pres që Bylisi të shfaqet agresiv në lojë dhe të jetë i karikuar maksimalisht për ndeshjen e nesërme.

Në shumë takime, kanë luajtur një numër i caktuar lojtarësh. Nuk do të thotë që lojtarët që kanë marrë pak minuta të mos jenë titullarë. Çdo lojtar që është pjesë e këtij ekipi duhet të jetë i gatshëm për çdo moment.

Sfida me Skënderbeun? Nuk ishim në formën e duhur dhe të karikuar në pjesën e parë. Në dhomat e zhveshjes u thashë lojtarëve: ‘Çuna, jam i bindur që ju mund ta ktheni rezultatin’. Nesër kemi ndeshje me Bylisin. Pas kësaj ndeshjeje do të mendojmë për Kukësin”, deklaroi Egbo.