Eliminimi nga Kupa, Conte ka një mesazh për gjyqtarët dhe për garën për titull

Napoli i dha lamtumirën edhe Kupës së Italisë, duke humbur kështu objektivin e dytë sezonal pas eliminimit nga Liga e Kampionëve. Skuadra e Antonio Contes u mposht nga Como me penallti (8-7) në “Maradona”, pas një sfide të ekuilibruar që u mbyll 1-1 në kohën e rregullt.

Nga pika e bardhë rezultuan vendimtare gabimet e Lobotkës dhe, më herët, të Lukakut, ndërsa për Comon penalltia decizive u realizua nga Baturina. Në gjysmëfinale do të përballet Como me Interin, me ekipin e drejtuar nga Cesc Fabregas që arriti të rezistojë dhe të triumfojë në “ruletën” e 11-metërshave.

Pas ndeshjes, Antonio Conte shmangu alibitë, por dërgoi një mesazh të qartë për gjyqtarët: “Nuk është një sezon i mirë për arbitrat dhe VAR-in, duhet një hap përpara”. Trajneri italian uli tonet edhe për garën për titullin: “Jemi nëntë pikë pas Interit dhe kemi shumë probleme. Duhet të mendojmë ndeshje pas ndeshjeje”.

Conte mbrojti grupin e tij, duke theksuar mungesat e shumta: “Nder për djemtë, po shkojmë përtej mundësive tona. Kemi 6-7 mungesa të rëndësishme, luajmë gjithmonë me të njëjtët dhe humbasim edhe lojtarë të tjerë si McTominay. Kjo nuk i ka ndodhur askujt tjetër”. Ai preku edhe merkaton, duke zbuluar se klubi nuk kishte mundësi ndërhyrjeje: “Më është thënë se nuk mund të bëhej asgjë, përveç afrimeve me parametër zero”.