Elkann premton 1 milion euro shpërblim për lojtarët e Juventusit në rast kualifikimi ndaj Realit

Presidenti i grupit Exor dhe pronari i Juventusit, John Elkann, ka vendosur të ndërhyjë personalisht për të motivuar skuadrën bardhezi në Kupën e Botës për Klube. Sipas asaj që raporton “Tuttosport”, Elkann ka premtuar një bonus prej 1 milion eurosh për lojtarët në rast se arrijnë të kalojnë pengesën e Real Madridit në fazën e eliminimit direkt.

Ky shpërblim, që përkthehet në rreth 30 mijë euro për secilin lojtar, synon të rrisë moralin dhe përkushtimin në një ndeshje me rëndësi të veçantë. Burime pranë klubit nuk përjashtojnë mundësinë që shifra të rritet edhe më shumë në rast të kualifikimit në gjysmëfinale.

Ky gjest tregon edhe njëherë rëndësinë që i jepet këtij turneu nga drejtuesit bardhezi, të cilët duan të rikthejnë Juventusin në nivelet më të larta të futbollit botëror.