Është i pazëvendësueshëm për Conten, Interi bën gati rinovimin me Brozovic

Marcelo Brozoviç është një nga futbollistët e pazëvendësueshëm në formacionin e Antonio Contes.  Përveçse prek një numër shumë të madh topash në çdo ndeshje, kroati është një “maratonomak’ në fushën e lojës, pasi vrapon më shumë se kushdo në kampin zikaltër, por edhe në Serinë A.

Pikërisht për këto cilësi, Brozovic ka tërhequr vëmendjen e disa klubeve të mëdha europiane, por zikaltrit nuk kanë ndërmend të heqin dorë prej tij dhe kanë nisur këto ditë negociatat për rinovimin e kontratës.

Aktualisht kroati është i lidhur me Interin deri në verën e 2022-shit, dhe ka një klauzolë largimi përkundrejt shifrës së 60 milionë eurove, e vlefshme vetëm në dy javët e para të korrikut dhe vetëm për klubet jo italiane.

Në kontratën e re, Interi pritet t’i rrisë ndjeshëm pagën e tij, teksa ajo pritet që të zgjatet me të paktën dy sezone të tjera.