FC Tigres përmbys gjithçka ndaj FC Implant Swiss dhe ngjitet në vendin e dytë

FC Tigres regjistroi një fitore të madhe mbrëmjen e djeshme, duke triumfuar me rezultatin 3–2 ndaj FC Implant Swiss, në një ndeshje të zhvilluar në Kompleksin Internacional, e vlefshme për kampionatin. Një sukses i ardhur pas një përmbysjeje spektakolare, që konfirmon momentin pozitiv të skuadrës dhe ambiciet e saj për titull.

Takimi nisi me disa ndryshime në formacion nga stafi teknik i Tigres, i cili la në stol disa prej lojtarëve kryesorë. Megjithatë, starti ishte ideal për vendasit, pasi i rikthyeri Jurgen Likollari gjeti rrugën e rrjetës që në minutat e para, duke i dhënë avantazhin skuadrës së tij. Pas golit, loja u bë më e luftuar dhe në fundin e pjesës së parë, FC Implant Swiss reagoi fort, duke arritur të përmbysë rezultatin dhe ta mbyllë 45-minutëshin e parë në epërsi.

Pjesa e dytë solli një tjetër fytyrë të FC Tigres. Me hyrjen në fushë të Markeljan Ozunit, Sabri Picarit dhe Kledi Tolës, ritmi i lojës ndryshoi menjëherë. Pikërisht Tola u bë protagonist, duke shënuar golin e barazimit sapo nisi fraksioni i dytë, çka i dha besim dhe energji skuadrës.

Goli i fitores erdhi pas një aksioni të bukur individual nga krahu i të rikthyeri Sulejman Masha, i cili me një driblim të shkëlqyer krijoi hapësirën e nevojshme dhe asistoi saktë për Albi Allën. Ky i fundit nuk gaboi përballë portës, duke vulosur shifrat përfundimtare 3–2.

Me këtë fitore, FC Tigres vazhdon ecurinë pozitive, ngjitet në vendin e dytë të renditjes dhe tashmë ndodhet vetëm një pikë larg kreut, duke mbajtur të gjalla shpresat për titullin kampion.