FIFA “ngrin” merkaton e Vllaznisë, 3 vendime brenda 5 ditësh ndaj klubit shkodran

Kryesuesja e Superligës, Vllaznia, është përballur me një goditje të rëndë nga FIFA, e cila ka vendosur bllokimin e merkatos së klubit për shkak të borxheve të pashlyera ndaj ish-futbollistëve dhe ish-zyrtarëve. Brenda vetëm pesë ditësh, shkodranët kanë marrë tre vendime negative nga organet disiplinore të FIFA-s.

Sipas dokumenteve zyrtare, më 19 nëntor është regjistruar një vendim i parë për detyrime të papaguara, ndërsa dy të tjerë kanë mbërritur më 24 nëntor. Situata e krijuar detyron Vllazninë të shlyejë sa më shpejt borxhet në mënyrë që të fitojë të drejtën për të bërë afrime të reja në merkaton e janarit 2026.

Problemet financiare nuk prekin vetëm klubin shkodran. FIFA mban aktualisht të bllokuar për tre sesione merkatoje edhe disa skuadra të tjera shqiptare, përfshirë KS Luftëtarin (i shkrirë dhe rithemeluar si AF Luftëtari), Orikun, Kastriotin dhe Valbonën.

Të gjitha këto klube janë penalizuar për borxhet e papaguara ndaj ish-lojtarëve apo ish-stafit të tyre dhe janë të detyruara t’i shlyejnë përpara se të rikthehen në aktivitet të plotë në tregun e transferimeve.

Situata financiare e klubeve shqiptare rikthehet kështu në qendër të vëmendjes, ndërsa presioni ndaj drejtuesve për të zgjidhur çështjet e hapura rritet dita-ditës.