FOTO/ Ibrahimovic “sheh” që tani kuqezi, sulmuesi bashkohet me Milan në 2 janar

Pritet vetëm zyrtarizimi, por nuk ka më asnjë dyshim për rikthimin e Zlatan Ibrahimovic te Milan. Klubi kuqezi dhe sulmuesi suedez kanë arritur marrëveshjen, teksa mbetet vetëm formalizimi i kontratës dhe prezantimi i futbollistit. Mediat italiane, prej ditësh i kishin paraprirë marrëveshjes, teksa kanë zbuluar edhe detajet që kanë bindur Zlatan të bashkohet sërish me “Djallin”.

Ibrahimovic do të mbërrijë në Milano më 2 janar, kur edhe do të firmosë kontratën e parë 6 mujore, nga e cila do të fitojë 3.5 milion euro. Në të parashikohen disa klauzola lehtësisht të arritëshme në aspektin personal, çka e bëjnë një formalitet edhe rinovimin e kontratës në fund të sezonit edhe për një tjetër vit. Megjithëse në moshën 38 vjeçare, sulmuesi suedez shihet nga drejtuesit e klubit milanist Maldini dhe Boban, por edhe nga pjesa më e madhe e tifozëve, si njeriu që do të shkundë ambientin kuqezi dhe do të ndryshojë rrjedhën e një sezoni që po shkon drejt dështimit total.