Franca shumë e fortë për Argjentinën, “Gjelat” këndojnë në Kazan (VIDEO)

Franca është çerekfinalistja e parë e Kupës së Botës. “Gjelat” morën një fitore spektakolare me përmbysje ndaj Argjentinës në shifrat 4-3, duke u konfirmuar si një nga skuadrat favorite për në Rusi.

Ndeshja nisi me shumë ritëm, teksa Griezmann dha sinjalin e parë, duke tronditur shtyllën që në fillimin e duelet. Në minutën e 11-të, Mbappe ka shpërthyer në një aksion personal, duke detyruar Rojon, që të shkaktojë faull në zonë. Nga pika e bardhë shkon Griezmann, duke mposhtur portierin Armani, i cili nuk ka mundur të kuptojë krahun e gjuajtjes. 4 minuta nga fundi i pjesës së parë, Angel Di Maria shënon një super gol, pas një goditje shumë të bukur në hyrje të zonës.

“Albicelestët” marrin zemër nga goli dhe në fillimin e pjesës së dytë, gjejnë avantazhin me Mercadon, i cili devijon në rrjetë një goditje të Messit. Zgjati vetëm 9 minuta avantazhi i Argjentinës në pjesën e dytë ndaj Francës. Në minutën e 57-të Pavard shënoi ndoshta golin më të bukur të Botërorit të Rusisë. Në minutën e 68-të, Mbappe realizoi golin e dytë personal, pas një asisti shumë të bukur të Giroud në hyrje të zonës.

Në minutat shtesë, Aguero shënoi golin e tretë për Argjentinën, por Franca ruajti deri në fund avantazhin, duke siguruar një vend në çerekfinale, ku do të përballen me fituesin e çiftit Uruguai-Portugali më 6 korrik në orën 16:00. /Koha Jonë/