Futbollistët rikthehen në fushë, Gurishta: Mungesa na ka penalizuar

Pas shumë javëve bojkot, ndeshjet e Kupës së Shqipërisë shënuan fillimin e një sezoni që duhej që të kishte nisur kohë më parë por që u pamundësua nga bojkoti i klubeve të superligës. Forma e vërtetë e skuadrave pritet të shihet në ndeshjet e kampionatit pasi kupa ishte vetëm për të bërë nxehjen përpara një sezoni që pritet të jetë mjaft i ngjeshur.

Futbollistët ndihen të lumtur që më në fund u rikthyen, edhe pse e pranojnë se kjo periudhë shkëputjeje i ka penalizuar jo pak pasi nuk është e lehtë të ruash formën pa pasur aktivitet fizik. ”Normalisht të gjithë mezi po prisnim që të fillonim kampionatin. Gjendja ime nuk është 100% e mirë, por besoj se me kalimin e ditëve do të jetë në maksimum”,-thotë Erdenis Gurishta, futbollist i Vllaznisë.

Harallamb Qaqi, futbollist i Skënderbeut, shprehet se ishte optimist për shfaqjen e tyre në ndeshjen e radhës. ”Na kishte munguar shumë e prisnim shumë kohë këtë moment, një ndeshje zyrtare besoj se në ndeshjen radhës do shfaqemi akoma më mirë dhe shikojmë vazhdimësinë”,-tha Qaqi. Kategoria Superiore nis këtë të mërkurë, ku Tirana-Kukësi dhe Teuta-Skënderbeu janë dy takimet që spikasin më shumë.