Giaccherini: Zhegrova i jashtëzakonshëm, ka lëvizje të një futbollisti të madh!

Ish-lojtari i Juventusit dhe Napolit, Emanuele Giaccherini, ka folur për Tuttosport, ku kujtoi periudhën e tij te bardhezinjtë dhe komentoi situatën aktuale të skuadrës së drejtuar nga Luciano Spalletti.

Duke iu rikthyer viteve të tij te Juventusi, Giaccherini i cilësoi ato si “ndoshta më të bukurat e karrierës”, duke theksuar rëndësinë e fitimit të titullit të parë pas një periudhe të vështirë për klubin. Ai përmendi edhe shpërthimin e Paul Pogba-s në sezonin e dytë si një nga momentet më të veçanta.

Sa i përket gjendjes aktuale të Juventusit dhe mungesës së Dusan Vlahoviç, Giaccherini komentoi idenë e Spallettit për të aktivizuar Yildiz si “fals 9”, por la të kuptohet se edhe Jonathan David është në formë të mirë.

Në këtë kuadër, ai përmendi edhe mundësinë e aktivizimit të Edon Zhegrovës: “Zhegrova ka lëvizje prej futbollisti të madh dhe një talent të jashtëzakonshëm. Pyetja që shtrohet është për gjendjen e tij fizike. Duhet ta çosh në 100% dhe kjo bëhet vetëm duke e aktivizuar. Ka pasur dëmtime sezonin e kaluar, por me minutazh të rregullt mund të gjejë vazhdimësi.”