Gjysmëfinalja e Superkupës Barcelona-Real luhet për herë të parë në Arabinë Saudite

Nesër do të luhet gjysmëfinalja e Superkupës së Spanjës mes dy rivalëve të përjetshëm në fushën e blertë si Barcelona-Real Madrid. Për herë të parë El Clasico do të luhet në Arabinë Saudite dhe dy skuadrat kanë udhëtuar nga Spanja me kufizime të shumta dhe masa strikte si pasojë e situatës së vështirë nga Covid-19.

Në prag të super duelit, trajneri Ksavi Hernandez ka marrë një lajm pozitiv pasi grupit i është bashkuar dhe talenti Ansu Fati, i cili siç raportohet është rikuperuar plotësisht. Lajmi u konfirmua kur emri i tij u tha dhe në listën e lojtarëve të grumbulluar ndonëse fjala e fundit i takon mjekëve. Përveç tij në listë bien në sy dhe dy futbollistë të tjerë të rëndësishëm si Araujo me De Jong.

Carlo Ancelotti ndërkohë i gëzohet rikthimit të Carvajal dhe Luka Jovic, të cilët janë stërvitur me grupin dhe janë gati për El Klasicon. Ai që vijon me shqetësimet e tij është i përhershmi Gareth Bale. Barcelona-Real Madrid do të luhet këtë të mërkurë në orën 20:00 dhe sipas Federatës Spanjolle 30 mijë tifozë do të kenë mundësi ta shohin nga afër.