Gripi i prish punë Milanit, Pioli pa dy lojtarë titullar ndaj Veronës

Nuk ka aspak lajme të mira për Milanin në prag të transfertës ndaj Veronës. Trajneri Pioli në konferencën e zakonshme për mediat ka konfirmuar se Zlatan Ibrahimovic nuk do të jetë i grumbulluar në këtë ndeshje, ashtu si blerja tjetër, Simon Kjaer.

“Zlatan dhe Kjaer janë me grip prej 2-3 ditësh, vështirë se do të grumbullohen. Kemi probleme edhe me Krunic, do të shohim nëse do ta përfshij në ekip. Kjaer me siguri nuk do të jetë nesër, por do të jetë gati për derbin. Duhet të përqendrohemi te ndeshja me Veronën. Mund të bëjmë disa ndryshime edhe në formacion.

Kam kuptuar se futbollistët tanë kanë kualitet dhe kanë treguar se mund të luftojnë në momente të vështira. Të fitosh të jep më shumë besim. Juric te Verona po bën një punë të shkëlqyer, pasi janë një ekip që vrapojnë shumë. Për ne ka qenë një javë e veçantë, ndaj duhet të ruajmë përqendrimin.

Merkato? Me Ibrën, Kjaer dhe Begovic kemi më shumë personalitet. Kemi bërë ndërhyrjet e duhura”, deklaroi Pioli. /R.Lika-Koha Jone/