Humbja e kuqezinjëve në Poloni, Lala: Me më shumë guxim, edhe mund ta fitonim ndeshjen

Kombëtarja shqiptare e futbollit e nisi me humbje fushatën kualifikuese për Europianin 2024. Kuqezinjtë e Sylvinhos humbën 1-0 me Poloninë në Varshavë, teksa tanët bënë një lojë të mirë sulmuese dhe me katër raste të pastra shënimi.

Altin Lala, ish-kapiteni i kombëtares tregon sesi e pa ai ndeshjen. “Paraqitja nuk ishte e keqe, por rezultati nuk ishte i mirë dhe futbolli varet nga rezultati. Kishim mundësi për të marrë edhe 3 pikët, pasi Polonia nuk ishte një ekip që të fuste frikën. Po të kishim edhe më tepër guxim, do të ishte e mundur edhe ta fitonim ndeshjen. Kishim më shumë raste të pastra për të shënuar”, tha Lala.

Në lidhje me ndryshimet e Shqipërisë së Sylvinhos nga ajo e Rejës, ish-mesfushori theksoi se “për një kohë kaq të shkurtër është e vështirë” që të dalësh në përfundime. “Nëse e fitojmë ndeshjen e radhës, do të jemi aty ku duhet të jemi”, theksoi Lala.