Humbje në shtëpi për Vllazninë, Daugavpils fiton minimalisht në “Elbasan Arena”

Vllaznia ka pësuar një disfatë të hidhur në sfidën e parë të turit të parë të UEFA Conference League, duke u mundur me rezultatin 0-1 nga letonezët e Daugavpils në “Elbasan Arena”.

Shkodranët nisën fuqishëm takimin, duke ushtruar presion të vazhdueshëm në zonën kundërshtare. Kruja dhe Dodaj krijuan rastet më të mira për gol në pjesën e parë, por pa mundur të tundin rrjetën. Fraksioni i parë u mbyll pa gola, por me një dominim të dukshëm të kuqebluve.

Në pjesën e dytë, Vllaznia intensifikoi edhe më shumë presionin. Qato provoi nga distanca, por ndërhyrjet e sakta të portierit letonez e mbajtën rezultatin të pandryshuar.

Pavarësisht përpjekjeve të shumta, Daugavpils qëndroi kompakt në mbrojtje dhe goditi në momentin e duhur. Vetëm pesë minuta para fundit, Lizunovs realizoi golin e vetëm të takimit, duke i dhënë fitoren skuadrës mike dhe duke vënë në vështirësi Vllazninë përpara ndeshjes së kthimit.

Tani, shkodranëve u duhet një përmbysje në Letoni për të mbajtur gjallë ëndrrën europiane.