Hysaj i kundërpërgjigjet Dukës: Napoli ndryshe nga Kombëtarja!

Elseid Hysaj shuan menjëherë polemikat e krijuara në media për shiritin e kapitenit. Duke folur pas suksesit ndaj Kazakistanit, futbollisti shkodran analizoi edhe një deklaratë të Dukës se “ai do të donte që të luante në Kombëtare si te Napoli”.

“Për Hysajn është e rëndësishme kjo fitore, por më  rëndësishme është për grupin. Siç u pa edhe në ndeshjen e sotme bëmë sakrificë të gjithë dhe ja dolëm. Një fitore që na vlen të gjithëve dhe duhet që të luajmë kështu në ndeshjen e radhës.

Shiriti është siç e a shpjeguar trajneri. Ka qenë Strakosha në portë, nuk ka luajtur Berisha e kam mbajtur unë shiritin. Dihet që shiritin në Kombëtare do e mbaj lojtari më i vjetër. Nuk ka se çfarë të diskutojmë.

Në Napoli luaj çdo ditë me ata lojtarë, janë futbollistë që kanë vlera të mëdha. Te Shqipëria unë jam 3-4 ditë. Moduli ndryshon dhe gjithçka është ndryshe nga Napoli. Unë jap maksimumin, pastaj varet edhe nga loja, unë nuk luaj kurrë me skemën 3-5-2. Varet nga dinamikat e lojës, jo gjithmonë mund të jem perfekt si te Napoli ashtu edhe në Kombëtare”, deklaroi lojtari shkodran.