Ibrahimovic mbyll sezonin me Milanin, rrezikon edhe duelin e parë në “Euro 2020”

Dëmtimi që Zlatan Ibrahimovic pësoi në gju në fitoren m 0-3 ndaj Juventusit në Allianz Stadium ka rezultuar më i rëndë sesa parashikohej. Bomberi suedez do të mungojë në 3 ndeshjet e fundit të sezonit kundër Torinos, Cagliarit dhe Atalantës.

Ibrahimovic e ka mbyllur para kohe këtë sezon dhe do të jetë një mungesë e madhe për Milanin në 3 ndeshjet e fundit duke patur parasysh rëndësinë që ai ka në skuadër. Në 27 ndeshje me kuqezinjtë në të gjitha kompeticionet gjatë këtij sezoni, Ibra ka arritur të realizojë plot 17 gola.

Nga dëmtimi i pësuar në sfidën ndaj Juventusit, 39-vjeçari rrezikon të dhumbasë edhe debutimin me Suedinë në Euro 2020. Përfaqësuesja skandinave bën pjesë në grupin E së bashku me Spanjën, Sllovakinë dhe Poloninë me Ibrën që do të humbasë me siguri duelin e 14 qershorit ndaj La Rojas me shpresën për të qenë gati për takimin e dytë në grup atë ndaj Sllovakisë në 18 qershor, në rastin më të keq shpreson të luajë ndaj Polonisë më 23 qershor.