Ilir Daja pas humbjes 1-2 ndaj Hajdukut: Gjithçka mbetet e hapur, besojmë te përmbysja në Tiranë

Trajneri i ekipit shqiptar, Ilir Daja, është shprehur i kënaqur me paraqitjen e lojtarëve të tij në pjesën e parë të ndeshjes ndaj Hajduk Split, e zhvilluar në Kroaci, pavarësisht humbjes 2-1.

“Kemi bërë një pjesë të parë të mirë. Luajtëm me intensitet dhe krijuam disa raste në portën kundërshtare. Ishte një eksperiencë e mirë për ne pas gati 15 vitesh mungesë në Europë, shumë lojtarë luanin për herë të parë në një kompeticion europian,” deklaroi Daja.

Ai pranoi se në pjesën e dytë skuadra bëri disa gabime që i kushtuan: “Ia dhuruam topin kundërshtarit dhe mund të dilnim më mirë në krahë, pasi ata po bënin presion në qendër. Ndikuan edhe mungesa e Karambës dhe largimi i Itodos.”

Megjithatë, trajneri theksoi se rezultati lë gjithçka të hapur: “Mendoj se humbja 2-1 në fushën e Hajdukut, një ekip me shumë eksperiencë në Europë, nuk është keq. Janë edhe 90 minuta të tjera. Në Tiranë mund të bëjmë më mirë. Hajduku është favorit, por gjithçka mbetet e hapur dhe ne besojmë.”

Daja shtoi se kjo ndeshje ka shërbyer edhe për të rritur eksperiencën e lojtarëve të rinj: “Kemi aktivizuar lojtarë të rinj në moshë, të cilët fitojnë eksperiencë duke luajtur para kaq shumë tifozësh.”