Inter hidhet në sulm për Kumbullën, por duhet kujdes nga Lazio dhe Napoli

Interi është gjithmonë e më shumë i interesuar për Marash Kumbullën. Mbrojtësi i Veronës është kthyer në një nga objektivat kryesor në merkaton e verës, teksa Marotta dhe Ausilio kërkojnë që të bindin futbollistin dhe agjentin e tij Gianni Vitali. Klubi zikaltër kërkon të përfitojë nga huazimi i Dimarco-s për të gjetur një formulë të përshtatshme për transferimin në “San Siro”.

Interi do të bëjë të pamundurën për të mos i ikur rasti nga duart, por duhet pranuar se konkurrenca për shërbimet e mbrojtësit të Kombëtares Shqiptare është shtuar ndjeshëm. Për Kumbullën, javët e fundit ka punuar me shumë këmbëngulje presidenti i Napolit, De Laurentiis, i cili kishte arritur një marrëveshje me homologun e tij Setti për 21 milionë euro, plus 4 milionë bonuse. Kumbulla, gjithsesi nuk ka ndezur dritën jeshile për transferimin, duke i ngrirë bisedimet.

Pas këtij qëndrimi të shqiptarit qëndron pikërisht Interi. Drejtuesit zikaltër e kanë takuar disa herë menaxherin e djaloshit me origjinë nga Shkodra, duke e bindur që projekti i Contes do të ishte shumë i rëndësishëm për të. Lazio me Fiorentinën kanë studiuar terrenin për të kuptuar mundësitë që kanë për blerjen e Kumbullës, por frika më e madhe vjen nga Bundesliga. Për mbrojtësin, javët e fundit ka shfaqur interes edhe Borussia e Dortmundit, teksa skuadra ka gjermane ka treguar se është një skuadër ku të rinjtë mund të njohin vendin për t’u perfeksionuar.