Interi fiton ndaj Veronës dhe merr kreun e Seria A (VIDEO)

Interi ngjitet në vendin e parë, të paktën për disa minuta në pritje të sfidës së Milanit. Zikaltit fituan 2-1 në transfertën ndaj Veronës. Ishte një sfidë e vështirë për skuadrës së Contes, që vuajti mungesën e hapësirave në 45 minutat e para duke e mbyllur në barazim pa gola.

Në fillimin e pjesës së dytë Hakimi shërben një asist fantastik për Lautaro Martinez, i cili godet saktë brenda zonës. Verona nuk dorëzohet, teksa do të barazonte rezultatin në minutën e 63-të, me Ilic, i cili përfitoi nga një gabim i portierit Handanovic.

Gëzimi për ekipin e Juric zgjati vetëm 6 minuta, pasi Hakimi shërbeu një tjetër asist për Skriniar. Mbrojtësi sllovak kërcen mjaft mirë me kokë duke e dërguar topin në rrjetë. Me këtë fitore Interi ngjitet në vendin e parë me 33 pikë, 2 më shumë se Milani. /R.Lika-Koha Jone/