Interi shton presionin për super talentin shqiptar që po shkëlqen te Empoli

Kristjan Asllani duket se shumë shpejt do të bëjë hapin e madh në karrierë. Mesfushori i talentuar shqiptar është drejt një transferimit te skuadra e Interi. Zikaltrit janë në kërkim të një mesfushori të aftë për të zëvendësuar kroatin Beozovic, pasi edhe trajneri Inzaghi ka pranuar se nuk ka asnjë futbollist me karakteristikat për të luajtur para mbrojtjes dhe këto cilësi duket se i ka mesfushori 20-vjeçar shqiptar.

Ky i fundit ka luajtur një ndeshje perfekte si titullar ndaj Interit në janar në Kupën e Italisë dhe që atëherë është shndërruar në titullar të padiskutueshëm te Empoli, duke tërhequr vëmendjen e shumë kubeve me paraqitjen e tij. Zilaltrit vlerësojnë jo pak Asllanin, pasi e shohin si lojtarin ideal për t’u rritur akoma nën hijen e Brozoviç dhe shumë shpejt për të marrë frenat e mesfushës në dorë.

Marrëdhëniet mes dy klubeve janë të shkëlqyera, pasi te Empoli zikaltrit kanë dhënë në huazim sulmuesin Pinamonti dhe të premten dy skuadrat përballen në kampionat, ku do të diskutojnë padyshim edhe për Asllanin.

Plani i Interit është ta marrë në huazim me të drejtë blerjeje për 20 milionë euro mesfushorin shqiptar, teksa te Empoli pritet të përfundojë në huazim edhe sulmuesi 19-vjeçar Sebastiano Espozito, i cili aktualisht luan te Baseli në Zvicër.