Investimi i FSHF në Përrenjas, vijojnë punimet për ndërtimin e dy fushave të reja

Po vijojnë me ritme të larta punimet për ndërtimin e dy fushave të reja sportive në Përrenjas, projekt i Federatës së Futbollit në bashkëpunim me Bashkinë e Përrenjasit, në kuadër të investimeve për zhvillimin e infrastrukturës së futbollit.

Punimet ndodhen aktualisht në fazën përfundimtare të ndërtimit të bazamentit, ndërsa gjatë javës së ardhshme do të nisë shtrimi i tapetit artificial. Projekti përfshin ndërtimin e një fushë me përmasa olimpike dhe një mini-fushë, ku fëmijët do të kenë mundësi të stërviten dhe të luajnë futboll në kushte optimale.

Këto ambiente të reja sportive do t’u shërbejnë sportistëve të rinj, shkollave dhe komunitetit lokal, duke krijuar kushte më të mira për stërvitje dhe aktivitete sportive.

Federata e Futbollit vijon angazhimin për të zgjeruar dhe modernizuar infrastrukturën sportive në bashkëpunim me pushtetin vendor, me synim rritjen e pjesëmarrjes dhe zhvillimit të futbollit në të gjithë vendin.