Juventus nis përgatitjet për supersfidën me Interin, Zhegrova synon grumbullimin

Numërimi mbrapsht për supersfidën e javës në Serie A, Juventus–Inter, ka nisur. Trajneri i bardhezinjve, Igor Tudor, do të ketë së shpejti të gjithë lojtarët në dispozicion, pasi të kthehen nga angazhimet me kombëtaret.

Të parët që do të zbarkojnë në “Continassa”, ditën e sotme janë Kenan Yildiz (Turqi), Teun Koopmeiners (Holandë) dhe Lois Openda (Belgjikë), të cilët kanë përfunduar tashmë detyrat me përfaqësueset e tyre.

Të martën pritet kthimi i italianëve Manuel Locatelli, Federico Gatti dhe Andrea Cambiaso (i cili megjithatë është i pezulluar për kampionat), si dhe i malazezit Vasilije Adžić.

Të mërkurën do të bashkohen të gjithë të tjerët: Kephren Thuram, Francisco Conceição, Dušan Vlahović, Filip Kostić dhe Jonathan David, i cili me Kanadanë do të luajë një miqësore në Uells. Në listë do të duhej të ishte edhe Jonas Rouhi, por ai është shumë pranë transferimit te belgët e Ëesterlo.

Situata e dëmtimeve është gjithashtu pozitive: Perin dhe Miretti janë drejt rikuperimit të plotë, ndërsa edhe për Juan Cabal nuk do të duhet të pritet shumë. E vetmja mungesë e sigurt është ajo e zakonshme e Arkadiusz Milik.

Nga ana tjetër, ka lajme të mira për Edon Zhegrovën: kosovari, i cili nuk u grumbullua nga përfaqësuesja për shkak të një problemi në aduktorë që e ka mbajtur jashtë fushe që nga dhjetori 2024, ka lënë përshtypje pozitive në stërvitjet e para në Torino. Ai shpreson të marrë një ftesë për derbin e Italisë, ndonëse për ta parë në formë të plotë do të nevojitet edhe pak kohë.