Juventusi po bën gati goditjen e madhe me kosto zero nga Bayerni

Largimi i David Alaba nga Bayern Munich duket se është i sigurt. Austriaku nuk ka pranuar asnjë nga ofertat e drejtuesve të klubit bavarez për rinovimin e kontratës dhe largimi i tij pas 11 vjetësh është thuajse shumë pranë.  Një futbollist 28-vjeçar me CV e tij dhe në përfundim të kontratës, që vlen 60-70 milionë euro, i shkon për shtat shumë klubeve të mëdha europiane që në verë do ta përfitonin kartonin e tij me kosto zero.

Mbrojtësit i ishte lënë kohë deri më 31 tetor për të dhënë një përgjigje për rinovimin, të cilin futbollisti nuk e pranoi duke e detyruar klubin të tërhiqet ofertën për zgjatjen e kontratës. Nga ana tjetër menaxheri i futbollistit, Pini Zahavi nuk ka humbur kohë pasi ka nisur menjëherë bisedimet me klube si Manchester City, Real Madrid dhe Juventus.

Klubi italian duket i avantazhuar pasi pëlqehet shumë nga Alaba, por problem për “Zonjën e vjetër” mbetet paga e lojtarët që kërkon 15 milionë euro plus bonuse, shumë kjo që konsiderohet e lartë për politikat që ndjekin bardhezinjtë. Gjithsesi, drejtori sportiv i Juventusit, Paratici do të vazhdojë ta monitorojë me kujdes çështjen për të gjetur një rrugëzgjidhje për ta sjellë futbollistin në Torino.