Kamberi transferohet te nënkampionët e Zvicrës

Florian Kamberi rikthehet në elitën e futbollit zviceran, me nënkampionët e Superligës së këtij vendi. Sipas “The Sun”, trajneri i Rangers, Steven Gerrard, kishte ofruar rreth 1 milion euro Hibernian, që zotëron kartonin e Kamberit, por marrëveshja dështoi.

Kamberi do të luajë tani me St Gallen, madje do ta nisë në Europa League, pasi skuadra zuri vendin e dytë në kampionatin helvet pas Young Boys. Bisedimet kishin nisur që me 13 korrik. Hibernians pranoi rikthimin e Kamberit në stërvitje kur kampionati skocez u mbyll në tavolinë, por trajneri ia bëri të qartë se nuk e kishte në plan, kështu që nisën bisedimet dhe St.Gallen u tregua më e shpejtë se Rangers, duke bindur edhe lojtarin, që duket si rikthim në shtëpi.

Hibernian e bleu Kamberin për 120 mijë euro nga Grasshoppers në vitin 2018, ndërsa në janarin e këtij viti e huazoi te Rangers, teksa tifozët u zemëruan pas deklaratës së sulmuesit se kishte realizuar një ëndërr. Edhe pse shënoi vetëm 1 gol, Kamberi la përshtypje të mira te Gerrard, por ky i fundit nuk këmbënguli shumë për ta mbajtur në skuadër, duke paguar për kartonin.