Kapiteni Gjimshiti shqetëson Atalantën, la para kohe fushën e lojës

Fitorja ndaj Cagliarit duket se do të lërë pasoja te skuadra e Atalantës. Ky sukses kalon në plan të dytë, ndërsa vëmendja përqendrohet te emergjenca që ka përfshirë repartin mbrojtës. Situata është alarmante për shkak të një sërë problemesh të njëpasnjëshme: dëmtime muskulare, viroza që kanë goditur disa lojtarë, si edhe mungesat e detyruara për shkak të grumbullimeve me kombëtaret.

Nota më shqetësuese e mbrëmjes lidhet me gjendjen fizike të Berat Gjimshitit. Mbrojtësi shqiptar u detyrua të ndalet në pjesën e dytë të ndeshjes, pasi ndjeu shqetësime në fleksorin e këmbës së djathtë, duke e bërë të pamundur vazhdimin e lojës.

Ky problem e detyroi trajnerin të hedhë në fushë të riun Ahanor, edhe për shkak të mungesës së papritur të Isak Hien, i cili u detyrua të qëndrojë jashtë për shkak të një gjendjeje gripale. Një situatë që ka thelluar më tej emergjencën në repartin defensiv.

Orët në vijim do të jenë vendimtare për Gjimshitin. Kapiteni pritet t’i nënshtrohet ekzaminimeve mjekësore për të kuptuar nëse ka dëmtime muskulare dhe për të përcaktuar kohën e rikuperimit. Ankthi mbetet i lartë, pasi alternativat në mbrojtje janë reduktuar ndjeshëm dhe çdo mungesë tjetër do ta komplikonte edhe më shumë situatën.