Kategoria e Parë/ Ndeshja Kastrioti-Besa shtyhet për shkak të kushteve atmosferike

Departamenti i Garave në Federatën Shqiptare të Futbollit ka njoftuar shtyrjen e takimit Kastrioti-Besa, i planifikuar të zhvillohej sot në kuadër të javës së 12-të të Kategorisë së Parë.

Vendimi erdhi pas inspektimit të kryer në stadiumin “Redi Maloku” në Fushë-Krujë, ku u konstatua se fusha ishte dëmtuar rëndë nga reshjet e shumta të shiut.

Gjendja e terrenit e bënte të pamundur që ndeshja të luhej në kushte të sigurta dhe të përshtatshme për futboll, ndaj Departamenti i Garave vendosi ta shtyjë për një datë tjetër.

Takimi do të zhvillohet nesër (e hënë) në orën 13:30, sërish në stadiumin “Redi Maloku”, duke i dhënë kohë fushës të rikuperohet nga kushtet atmosferike të ditëve të fundit.