Khephren Thuram ngacmon vëllain Marcus: Për Krishtlindje i dhuroj fanellën e Juves

Rivaliteti mes Juventusit dhe Interit nuk ndalet as në ditët e Krishtlindjes. Ta rikthejë në vëmendje ka qenë Khephren Thuram, protagonist i një videoje festive të publikuar nga DAZN, ku mes batutave dhe humorit nuk mungoi edhe një provokim i qartë me ngjyrat zikaltër.

I pyetur për dhuratat që do t’u bënte shokëve të skuadrës, mesfushori bardhezi rezervoi fjalët më pikante për vëllain e tij Marcus Thuram, sulmues i Interit: “Do t’i dhuroja një fanellë të bukur të Juventusit me emrin Thuram dhe numrin 19”. Një shaka vëllazërore që ndez edhe më shumë “Derbin e Italisë”, duke e zhvendosur rivalitetin nga fusha e lojës në ambientin familjar.

Ndërkohë, te Juventusi flitet seriozisht për të ardhmen. Spekulimet e ditëve të fundit për një shkëmbim të mundshëm me Davide Frattesin janë mohuar prerë nga Giorgio Chiellini, i cili para sfidës me Bolognan ka qenë i qartë: “Një gjë është e sigurt, Thuram është dhe do të mbetet lojtar i Juventusit. Nuk kemi asnjë dëshirë të heqim dorë prej tij, përkundrazi, rreth tij duam të ndërtojmë projektin e së ardhmes”.

Në fund, hapësirë edhe për notat më të lehta. Khephren Thuram zbuloi dhuratat ideale për dhomën e zhveshjes: një altoparlant muzike për Di Gregorion, një brisk për Cambiason që të rregullojë mjekrën, një biletë për Dubai për Kalulun dhe një shkop golfi për McKennien.