Klubet e La Liga-s marrin dritën jeshile për të rinisur stërvitjen

Në shumë kampionate në Europë ekipet kanë rinisur stërvitjet në pritje të një datë për të zbritur në fushën e lojës. Një prej kampionateve që po pret me padurim zbritjen në fushë është La Liga, që tashmë ka marrë edhe dritën jeshile nga Ministria e Shëndetësisë.

Lufta me Covid-19 duket se është hedhur pas krahëve, teksa tashmë është konfirmuar se skuadrat do të lejohen për të rifilluar punën që prej kësaj jave, me shpresën që sezoni 2019-2020 mund të përfundojë në fushë. Sipas protokollit të sigurisë së La Ligës, lojtarët do të stërviten në mënyrë individuale, por fillimisht do i nënshtrohen testeve për të mësuar nëse janë të prekur nga koronavirusi.

Skuadra e parë që pritet të zbresë në fushë, gjithmonë nëse asnjë prej lojtarëve të saj nuk rezulton pozitiv në testin e Covid-19 është Atletico Madrid. Los Colcheoneros pritet të dalin në stërvitje këtë të premte për t’u bërë kështu edhe klubi i parë spanjoll që rikthehet në fushë.

Pas tyre pritet të dalin me radhë skuadra si Barcelona dhe Valencia, teksa Zinedine Zidane do të ketë në dispozicion të tij lojtarët e Real Madrid të hënën e 11 majit.