Koeman: Asgjë nuk është e pamundur, përmbysja ndaj PSG e komplikuar!
Ronald Koeman ka folur në prag të sfidës së kthimit ndaj PSG në Champions League, duke shprehur besimin për një kualifikim të mundshëm. Skuadra katalanase do të tentojë përmbysjen e humbjen 4-1 të ndeshjes së parë. Një gjë të tillë ekipi Blaugrana e bëri edhe në Kupën e Mbretit, duke përmbysur humbjen 2-0 të ndeshjes së parë.
“Shpresojmë që gjithçka të jenë ndryshe nga ndeshja e parë. Gjithmonë ka jetë. Varet nga mënyra se si e fillojmë ndeshjen, nga energjia që vendosim në fushë, për t’ia komplikuar jetën kundërshtarit. Varet nga efektiviteti ynë. PSG provoi se kishte shumë potencial në ndeshjen e parë. Ne jemi një ekip, që gjithmonë krijojmë shanse. Duke pasur efektivitet optimal, asgjë nuk është e pamundur.
Unë mendoj se kemi pasur një moment të mirë në rezultate dhe lojë. Shkuarja në finale e Kupës së Mbretit, përmbysja ndaj Sevilla, na kanë dhënë besim. Sidoqoftë, nuk mund ta krahasoni përmbysjen ndaj Sevilla me këtë që na pret përpara. Përveç kësaj, PSG është një ekip i fortë, që aspiron më të mirën në Champions. Na duhet një ndeshje perfekte. Barcelona synon të fitojë në çdo ndeshje, shpresojmë se mund t’i komplikojmë gjërat për parisienët.
Do të jetë shumë e komplikuar për shkak të rezultatit të ndeshjes së parë. Ne luajmë kundër PSG, jo kundër një ekipi dosido. Duhet një ndeshje perfekte, e përsëris. Varet shumë nga vetja jonë. Është gjithmonë ndryshe të kesh një rezultat si ai ndaj Sevilla sesa një 1-4. Është mision i komplikuar në Paris, por asgjë e pamundur. Ne e dimë që jemi Barça”, deklaroi Koeman.
