Koeman: Messi te PSG? Le të flasin, e kemi mendjen te sfida me Sevillan

Trajneri i Barcelonës, Ronald Koeman i është përgjigjur zërave të fundit që vijnë nga Franca në lidhje me të ardhmen e numrit 10 argjentinas. Strategu i katalanasve replikoi edhe me kolegun e tij, Rudi Garcia në lidhje me të ardhmen e Memphis Depay.

“Nëse duan të flasin për Leo, le ta bëjnë; por tani hyn në debat edhe trajneri i Lyon. Si duket, ai dëshiron të ketë më shumë vëmendje në shtyp. Për mua nuk është e rëndësishme. Ajo që duhet të bëjmë është të përgatisim ndeshjet ndaj Sevilla dhe Alavés.

Dueli ndaj Sevillas? Është një ekip fizik, i organizuar mirë, me cilësi individuale. Kjo është arsyeja pse ndodhet në krye të renditjes dhe gjysmëfinalet e Kupës. Është një nga skuadrat më të kompletuara. Na duhet të jemi shumë të mirë me topin, të dalim nga presioni i tyre. Me nivelin tonë, mund t’i bëjmë dëm Sevilla”, deklaroi Koeman.