Kryeqyteti mirëpriti Maratonën e Tiranës, morën pjesë mbi 2500 garues nga 40 shtete të botës

Veliaj: “Fituam të gjithë, fitoi qyteti edhe vendi ynë”; Nikolla: “Maratona, në ritmin e punëve të qytetit”

Kryeqyteti ka mirëpritur me sukses, për të tretin vit radhazi, Maratonën e Tiranës, duke e kthyer në një traditë të bukur organizimin e një prej garave më të vjetra dhe masive në botë. Nën kujdesin e Bashkisë së Tiranës dhe Federatës Shqiptare të Atletikës, më shumë se 2500 vrapues, 350 nga të cilët të huaj, nga 40 shtete të ndryshme, garuan në tre kategori: “We too”, “Half Marathon” (21, 0975 km) dhe “Tirana 10K”.

Në kategorinë “Half Marathon” (21, 0975 km) fitues u shpallën Abel Kibet Rop nga Kenia dhe rekordmenia shqiptare, Luiza Gega. Ndërkohë, Nelson Kipkogei nga Kenia dhe Ruth Nundu Mbatha po nga Kenia, ishin fituesit e garës në kategorinë “Tirana 10K”. Bledar Suxha u shpall fitues i garës për personat më aftësi të kufizuara, We Too.

Kryetari i Bashkisë së Tiranës, Erion Veliaj, ndërsa i dorëzoi çmimin fitueses së garës prej 21 kilometra për femra, Luiza Gegës, u shpreh se Tirana fitoi gjithashtu garën e saj sa i përket organizimit dhe festës sportive. “Nuk morëm shumë çmime, por atë që morëm e qamë, dhe besoj se çmimi më i madh është për të gjithë ata që përfunduan garën. Në fund fituam të gjithë, fitoi qyteti edhe vendi ynë. Faleminderit të gjithëve nga zemra”, tha ai.

Ministrja e Arsimit dhe e Sportit, Lindita Nikolla, e cila i dorëzoi çmimin e parë fituesit të garës 21 km për meshkuj, vlerësoi organizimin e kësaj maratone që i ka dhënë qytetit një emër pozitiv në botë. Nikolla u shpreh entuziaste se ritmi i punëve të qytetit po përcillet edhe në një standard të ri në organizimin e maratonës. “Është fitore e madhe për qytetin, për Shqipërinë, që në fakt maratonomaku i punëve të këtij qyteti, Erion Veliaj, i ka dhënë Tiranës dhe Shqipërisë. Ndaj, kjo krenari e rimit të punëve të qytetit po përcillet edhe një standard i ri në organizimin e maratonës, kësaj energjie, këtij shpirti gare, por edhe një jete të shëndetshme përmes sportit”, deklaroi Nikolla.

Në nisje të garës, kryebashkiaku Veliaj theksoi faktin se Maratona e Tiranës është një ngjarje sportive ku garojnë jo vetëm sportistë, por ku promovohen kauza të ndryshme shoqërore, siç është edhe ajo e njerëzve me aftësi ndryshe. Ai falenderoi të gjithë vullnetarët, Policinë Bashkiake dhe Policinë e Shtetit, emergjencat, që u kujdesën për mbarëvajtjen e maratonës. “Ka një ushtri me njerëz të cilët janë vendosur përgjatë gjithë itinerarit. Ata janë vullentarët tanë, policia bashkiake, policia rrugore, emergjencat, infermierët, të gjithë ata që kanë punuar tek Liqeni, i cili për herë të parë është bërë pjesë e këtij itinerari. Jemi një qytet mirënjohës, ndaj dua që secili të ndjehet i falenderuar”, tha Veliaj.

Fituesit e Maratonës së Tiranës 2018

Kategoria Half Marathon (21, 0975 km)

Femra 21 km :
Vendi i I – Luiza Gega (Shqipëri) 01: 14’’ 18’’
Vendi i II – Agnes Chebet (Kenia) 01: 14’ 56’’
Vend i III – Christine Moraa Oigo (Kenia) 01: 15’ 59’’

Meshkuj 21 km:
Vendi i I – Abel Kibet Rop (Kenia) 01: 05’ 13’’
Vendi i II – Hosea Kiplagat Tuei (Kenia) 01:05’ 45’’
Vend i III – Evans Kipngetich Tanui (Kenia) 01: 07’ 12’’

Kategoria “Tirana 10K”

Femra 10 km:
Vendi i I – Ruth Nundu Mbatha (Kenia) 00: 36’ 41’’
Vendi i II – Hellen Jepkosgei Kimutai (Kenia) 00: 37’ 19”
Vend i III – Zita Kecser (Hungari) 00: 38’ 10’’

Meshkuj 10 km:
Vendi i I – Nelson Kipkogei Cherutich (Kenia) 00:32’ 31’’
Vendi i II – Matheë Kosgei (Kenia) 00: 32’, 59’’
Vend i III – Moses Kipruto Kibire (Kenia) 00:33’ 20’’

Kategoria “We too”
Vendi i I – Bledar Suxha (Shqipëri) 00:12’ 00’’
Vendi i II – Erblin Karaj (Shqipëria) 00: 12’ 08’’
Vendi i III – Dovlet Xhangolli 00:12’ 17’’