Kukësi goditje të dyfishtë në merkato, Hetemaj dhe Ymeri-n

Kukësi ka nisur me afrimet pas largimeve të emrave të rëndësishëm si Telushi, Obanor dhe Musta. Klubi verilindor nëpërmjet njoftimeve për shtyp, ka zyrtarizuar afrimin e Mbrojtësit Mehdi Hetemaj dhe të mesfushorit Ersil Ymeri.

Mbrojtësi shqiptar, i lindur në Austri, ka firmosur kontratën për 2 sezonet e ardhshme. Ai vjen në Shqipëri nga kampionati austriak, ku ka luajtur me ekipe të ndryshme. Së fundmi, 23-vjeçari ka qenë pjesë e Wiener Neustadt. Në të kaluarën, ai ka luajtur edhe me përfaqësuesen e Austrisë U-18.

Hetemaj i është bashkuar skuadrës verilindore në përgatitjet për sezonit e ri. Kontratë dyvjeçare ka firmosur edhe Ersil Ymeri. Mesfushori 26-vjeçar e njeh mirë kampionatin shqiptar, duke qenë se ka luajtur më parë me ekipet e Kamzës, Kastriotit e Laçit. Së fundmi, ai ishte pjesë e Llapit në kampionatin e Kosovës. Ymeri u prezantua sot në zyrat e klubit dhe do të bashkohet nesër me skuadrën.