Lazio dhuron spektakël, shkatërron Interin dhe merr kreun e Seria A (VIDEO)

Lazio ka arritur një fitore spektakolare 3-1 në super ndeshjen hapëse të javës së 3-të në Seria A. Skuadra e Sarrit ka zhvilluar një ndeshje të jashtëzakonshme në “Olimpico” duke dominuar në të gjitha aspektet ndaj nën/kampionëve të Italisë.

Bardhekaltrit ishin dominues në minutat e para, por rastet ishin të pakta në të dyja portat. Në minutën e 40-të, Milinkovic-Savic shërben një asist fantastik për Felipe Anderson, i cili arrin që të mposht portierin Handanovic me një goditje të saktë me kokë.

Interi reagon në fillimin e pjesës së dytë, duke gjetur golin e barazimit me Lautaro Martinez, që ndjek mjaft mirë një aksion dhe më pas e dërgon në rrjetë. Me kalimin e minutave skuadra e Sarrit shton dominimin në mbajtjen e topit dhe në raste. Në minutën e 75-të, Luis Alberto shënon një gol spektakolar nga distanca duke lënë të shtangur Handanovic.

Lazio nuk u ndal me kaq, pasi 4 minuta nga fundi shënoi dhe golin e sigurisë me Pedro që realizoi brenda zonës. Me këtë fitore, Lazio ngjitet në krye të renditjes me 7 pikë, ndërkohë që Interi pëson disfatën e parë sezonale. /R.Lika-Koha Jonë/