Lazio lë jashtë liste Elseid Hysaj, drejt largimit në merkaton e janarit

Lazio ka bërë tani zyrtarisht një ndryshim tjetër në listën e saj: Fisayo Dele-Bashiru është rikthyer në dispozicion të skuadrës. Ky vendim i jep Maurizio Sarrit një mundësi më shumë në mesfushë, repart që do të jetë pa Nicolò Rovella për disa javët e ardhshme.

Mesfushori nigerian është regjistruar në vend të Elseid Hysaj, i cili është jashtë planeve teknike dhe pritet të largohet në merkaton e janarit. Ndryshe nga Rovella, mbrojtësi shqiptar nuk ka probleme fizike dhe mund të ishte i vlefshëm në rotacion, duke pasur parasysh mungesën e thellësisë në skuadrën bardhekaltër.

Kjo lë hapur një pyetje të natyrshme: pse u zgjodh pikërisht Hysaj dhe jo Rovella për t’i bërë vend Dele-Bashiru? Çështja bëhet edhe më delikate duke pasur parasysh se, pas regjistrimit të Toma Basic gjatë mungesës së nigerianit, me këtë lëvizje Lazio ka shteruar të dy vendet ekstra të lejuara jashtë afatit të merkatos.

Sipas “Il Messaggero”, arsyeja lidhet me statusin e Rovella-s: ish-mesfushori i Juventusit është pjesë e grupit të katër lojtarëve të formuar në akademitë italiane, kategori që nuk mund të ndryshohet, duke e bërë të pamundur heqjen e tij nga lista.