Leao shpëton nga humbja Milanin, kuqezinjtë me fat ndaj Genoas në shtesë

Milani frenon në javën e 19-të të Serie A dhe humbet terren në garën për kreun. Kuqezinjtë barazuan 1-1 në “San Siro” ndaj Genoas, duke zbritur në -3 nga Interi kryesues, në një ndeshje ku rrezikuan seriozisht edhe humbjen.

Skuadra mike kaloi në avantazh në minutën e 29-të me Colombo-n, ish-lojtarin e Milanit, i cili përfitoi nga një pasiguri e Gabbias dhe mposhti Maignan pas një aksioni të bukur të ndërtuar nga Malinovskyi. Në pjesën e dytë, Milani shtoi presionin: në minutën e 58-të, VAR-i anuloi golin e Pulisic për prekje me dorë, ndërsa barazimi erdhi vetëm në minutën e 92-të me një goditje të saktë me kokë nga Leao.

Emocionet nuk mbaruan këtu. Në minutën e 99-të, Bartesaghi shkaktoi penallti, por Stanciu gaboi nga pika e bardhë, duke i mohuar fitoren Genoas. Milani i Allegrit e mbyll përkohësisht gjysmën e sezonit në vendin e dytë me 39 pikë, me një ndeshje për të rikuperuar ndaj Comos, ndërsa Genoa mbetet në kuotën e 16 pikëve, pranë zonës së rrezikut.