Leicester futet në garë për Muriqin, bën gati 40 milionë euro

Vedat Muriqi është në listën e dëshirave të disa skuadrave të njohura europiane. Sulmuesi i Kosovës ka shënuar 10 gola në 15 ndeshje në Superligën e Turqisë me fanellën e Fenerbahces, tashmë vlen 40 milionë euro. Kjo është shuma që kërkon gjiganti turk për kartonitn e sulmuesit “dardan”, që është shndërruar objektiv i disa skuadrave në Premier League, veçanërisht për Leicester City-n.

“Dhelprat” janë në kërkim të një sulmuesi cilësor për t’ia bashkangjitur Jamie Vardy-t e sipas medieve britanike, për trajnerin Brendan Rodgers njeriu i duhur për këtë rol është 25-vjeçari nga Prizreni.

Drejtuesit e Leicesterit mësohet se kanë dërguar përfaqësues për ta ndjekur shqiptarin në derbin e Stambollit mes Ferenbahces dhe Besiktasit dhe opinioni i tyre ka qenë pozitiv. Klubi turk, duke parë kërkesat për Muriqin, kërkon të përfitojë sa më shumë nga shitja e tij e mundshme, ndaj i ka vendosur një çmim të lartë prej 40 milionë eurosh.