Lirohen nga akuzat për korrupsion Blatter dhe Platini

Ish-presidenti i FIFA-s, Sepp Blatter dhe ish-presidenti i UEFA-s, Michel Platini, janë liruar nga akuza për korrupsion nga një gjykatë zvicerane.

Procedurat penale ndaj tyre nisën, pasi një pagesë prej dy milionë frangash zvicerane (1.7 milionë £) e bërë nga FIFA për Platinin, u zbulua në vitin 2015.

Blatter miratoi transferimin e fondeve nga FIFA tek Platini ndërsa bënte fushatë për t’u rizgjedhur në krye të qeverisë botërore të futbollit. Platini u pa se kishte ndikim mbi grupin evropian të votave, në garën e Blatter kundër Mohamed bin Hamamit të Katarit.

Qeveria amerikane nisi një hetim të gjerë për ryshfet, mashtrim dhe pastrim parash në FIFA në 2015, gjë që çoi në dorëheqjen e Blatter. Ai dhe Platini u përjashtuan nga futbolli për tetë vjet në vitin 2015, por kjo më vonë u reduktua.