Liverpooli nga një tjetër planet, shkatërron me “poker” Leicesterin (VIDEO)

Liverpooli është i pamëshirshëm këtë sezon në Premier League. Skuadra e Jurgen Klopp ka shkatërruar 4-0 Leicesterin, në shtëpinë e tyre. Kampionët e Europës, duken një ekip nga një tjetër planet, teksa këtë sezon, kanë vetëm një barazim dhe 18 fitore.

Të kuqtë gjetën rrugën e rrjetës në minutën e 31-të me Firminon, i cili shënoi me kokë pas një aksioni të gjatë. Me këtë rezultat do të mbyllej pjesa e parë pavarësisht shanseve të shpërdoruar nga Salah.

Në fraksionin e dytë ndeshja dominohet totalisht nga Liverpooli që arrin të shënojë 3 gola në harkun e 6 minutave. Fillimisht Milner shënoi nga pika e bardhë, ndërkohë që më pas Firmino dhe Alexandre-Arnold konkretizuan aksione shumë të bukura të kryesuesve të Premier League.

Një lojë e bukur dhe e rrjedhshme e ekipit të Klopp që nuk ka ndërmend të tolerojë asnjë kundërshtar gjatë këtij sezoni. /R.Lika-Koha Jone/