Lookman kërkon transferimin tek Interi, por Atalanta kërkon 50 milionë euro

Ademola Lookman është në qendër të një tratative të vështirë mes Interit dhe Atalantës, e cila aktualisht ndodhet në një ngërç total. Nuk ka përparim të ndjeshëm në bisedimet mes dy klubeve, të cilat vazhdojnë të qëndrojnë në pozicione të kundërta: Interi ofron 40 milionë euro, ndërkohë qëAtalanta kërkon 50 milionë euro.

Në gjithë këtë situatë, i vetmi që po përpiqet realisht të zgjidhë çështjen është vetë lojtari. Përmes agjentëve të tij, Lookman i ka bërë me dije Atalantës se dëshiron të transferohet te Inter, duke refuzuar të presë oferta nga klube të tjera.

Ai kishte dashur të largohej që verën e kaluar, pas disa përplasjeve me trajnerin Gasperini, dhe qëndrimi i tij nuk ka ndryshuar as pas largimit të teknikut, tashmë te Roma.

Në këto raste, kur lojtari shpreh qartë dëshirën për t’u larguar, shpesh palët gjejnë një mënyrë për të mbyllur marrëveshjen. Mbetet për t’u parë nëse do të jetë Interi që do të afrohet drejt kërkesës së Atalantës, apo klubi bergamask që do të ulë pretendimet.

Siç ndodh zakonisht në këto situata, një kompromis në mes të rrugës mund të jetë zgjidhja më e mundshme.