Luajti me 12 lojtarë për 17 sekonda, Gjykata Sportive fal Bayernin

Gjykata Sportive në Gjermani rrëzoi apelin e ekipit të Freiburg që kërkonte fitoren në tavolinë kundër Bayernit, i cili futi gabimisht 12 lojtarë në fushën e lojës. Me këtë vendim, Gjykata Sportive la në fuqi rezultatin 4-1 në favor të bavarezëve.

Përgjatë 17 sekondave, Bayern ishte me një lojtar më tepër sesa kundërshtari, pasi në minutën e 85, Coman, i cili u zëvendësua me Sule, nuk doli nga fusha. Arbitri e ndaloi ndeshjen sapo e vuri re se diçka nuk shkonte.

Rregullorja thotë se “nëse një lojtar i cili nuk ka të drejtë të luajë apo të përdoret në një ndeshje, luan në atë ndeshje, takimi konsiderohet i humbur 2-0 nga ekipi që e ka kryer shkeljen dhe i fituar 2-0 nga kundërshtari, përveçse në rastin kur arbitri e vazhdon ndeshjen pas përdorimit të lojtarit që nuk duhet të kishte luajtur”.