“Luftë e Paqe” në Pukë, rrëzohet Lushnja, “buzëqeshin” Bylis e Besëlidhja

Sporti E Diel, 18 Prill 2021 22:47

Mbyllen ndeshjet e javës së 17-të në Kategorinë e Parë dhe surpriza shënohet në Lushnjë ku fitoi Sopoti i Librazhdit, ndërkohë që në krye-ndeshjen e Grupit A mes Tërbunit e Mamurrasit nuk pati fitues, por u shënuan incidente me tifozët pas takimit. Gjithsesi përfituan nga kjo javë Besëlidhja dhe Bylis, që fituan dhe u afruan me kryesuesit në garë për t’u ngjitur në Superiore.

Grupi A

Paqe 1-1 në rezultat, por ndeshja në Pukë mes Tërbunit dhe Mamurrasit ka qenë tepër e tensionuar që nga fillimi dhe deri në përfundimin e saj. Vendasit nuk mundën dot të shkonin më larg se barazimi, edhe pse Mamurrasi mbeti me 10 lojtarë që në pjesën e parë. Pas ndeshjes, në një stadium të tejmbushur me tifozë, nga të dyja ekipet, pati edhe përplasje mes tyre. Hedhje objektesh të forta, sharje dhe ofendime e përplasje fizike mes tifozëve e bënë të vështirë për policinë që të kontrollonte situatën. Besëlidhja fitoi lehtësisht 2-0 ndaj Ilirisë në Lezhë dhe afrohet me dy kryesuesit, si një tjetër pretendente për t’u ngjitur në Kategorinë Superiore.

Grupi B

Bylis i Ballshit fitoi 1-2 në Pogradec dhe barazoi Lushnjën në krye të klasifikimit. Ballshiotët janë rreshtuar kësisoj si pretendentë për t’u rikthyer në Kategorinë Superiore. Idrizaj shënoi për Sopotin në Lushjnë dhe i dha fitoren librazhdasve, duke ndalur kryesuesit e Grupit B, në një surprizë të pakëndshme për vendasit që e menduan të lehtë fitoren. Ndeshja tjetër të zhvilluar në Sarandë, mes Butrintit e Dinamos, dy ekipe që pretendojnë ngjitjen në një kategori më lart u mbyll në barazim pa gola, 0-0, duke e bërë garën pas javës së 17-të mes ekipeve pretendente për t’u ngjitur në Superiore edhe më të ashpër e interesante.

Kategoria e Parë

Java e 17-të – Sot

Grupi A

Veleçiku-Kastrioti 3-5

Tërbuni-Mamurrasi 1-1

Ada-Besa 0-0

Burreli-Kamza 3-2

Besëlidhja-Iliria 2-0

Klasifikimi

Tërbuni 43

Mamurrasi 42

Besëlidhja 41