Manchester City firmos marrëveshje rekord me Puma, 1 miliard euro deri në vitin 2035

Manchester City, një nga klubet më të pasura në botën e futbollit, pritet të bëhet edhe më i fuqishëm ekonomikisht pas rinovimit të marrëveshjes me sponsorin teknik Puma. Sipas asaj që raporton The Guardian, kontrata e re do t’i sjellë klubit anglez plot 100 milionë euro në vit deri në vitin 2035, për një total prej 1 miliard eurosh – një shifër rekord në historinë e sponsorëve teknikë.

Ky akord i ri e zëvendëson marrëveshjen aktuale që ishte në fuqi deri në vitin 2029 dhe përfaqëson një rritje të jashtëzakonshme të të ardhurave për kampionët e Anglisë.

Lajmi për partneritetin e zgjeruar është bërë publik nga vetë Manchester City përmes kanaleve zyrtare, ndërsa detajet mbi shifrat janë zbuluar nga prestigjiozja britanike The Guardian. Marrëveshja e re e vendos City-n ndër klubet më të përfituara financiarisht nga sponsorët në nivel global.