Manchester United kontakton Allegrin, por strategu italian befason me përgjigjen

Vetëm dy fitore në 6 ndeshjet e fundit kanë vënë në rrezik pozicionin e Ole Gunnar Solskjaer në krye të Manchester United. Në Angli ndërkohë janë ringjallur zërat për Massimiliano Allegrin, i cili shihet si kandidati i duhur për të marrë drejtimin e Djajve të Kuq.

Drejtuesit e skuadrës angleze kanë kontaktuar italianin për të marrë menjëherë drejtimin e skuadrës, por përgjigja e italianit ka qenë e prerë: “Faleminderit por nuk marr drejtimin e një skuadre në kampionat e sipër, pres fundin e sezonit”.

Nëse Allegri do të kishte dhënë një përgjigje pozitive, me shumë mundësi Solskjaer do të ishte shkarkuar që përpara disa javësh. E ardhmja e Allegrit gjatë kësaj periudhe u lidh edhe me stolin e Arsenalin por në fund “topçinjtë” punësuan Artetën.

Max Allegri është kandidati kryesor për t’u ulur në stolin e United në fund të këtij sezoni, ndërkohë që sipas “Daily Mail” një kandidaturë tjetër për klubin nga Old Trafford për t’i besuar pankinën është edhe Maurizio Pochettino.