Mehmeti: Kukësi ekip i vështirë, kënaqemi edhe me 1 pikë!

Kastrioti do të ketë një ndeshje të vështirë këtë fundjavë kundër Kukësit, që vjen pas 3 fitoreve radhazi. Xhulio Mehmeti është një nga mesfushorët me më shumë peshë sportive tek kjo skuadër, por ai është shprehur se do të futen në fushë për të marrë pikë.

“Skuadra e Kukësit ka kualitete individuale nga më të mirat në kampionat. Është një ndeshje shumë e vështirë, pasi ata vijnë pas tre fitoresh, ashtu si edhe ne pas disa rezultatesh pozitive. Do të luajmë për rezultat pozitiv dhe do të bëjmë maksimumin të marrim të paktën një pikë. Mendoj se edhe një barazim është pozitiv ndaj Kukësit.

Atmosfera është mjaft e mirë, pasi edhe rezultatet pozitive të javëve të fundit na kanë dhënë qetësi. Po punojmë shumë për të bërë paraqitje edhe më të mira, duke nisur nga ndeshja e fundjavës ndaj Kukësit.

Kampionati është shumë i gjatë dhe ka shumë javë deri në fund, ndaj ne do të jemi të angazhuar në maksimum në çdo ndeshje, për të arritur sa më shpejt objektivin tonë”, u shpreh Mehmeti.